18 ёш “рулга ўтириш” учун эрта. Ҳайдовчилик гувоҳномаси бериш ёшини узайтириш керак!

 

 

Бунга  жорий йилнинг  5 сентябр куни Қашқадарё вилояти Деҳқонобод туманида содир бўлган бахтсиз ҳодисани мисол келтириш мумкин.  Aвария содир этган шахс 19 ёшли ҳайдовчи С. Ж.

ИИВ Йўл ҳаракати хавфсизлиги бош бошқармаси бошлиғи Баҳром Назаров берган маълумотларга кўра, ҳайдовчи бошқарувида бўлган “Nexia” автомобили  назоратни йўқотиб, 15 метр чуқурликдаги жарликка қулаб тушган. Воқеа 13:30 атрофида, М39 Олмаота-Тошкент-Термиз халқаро автомобиль йўлининг Деҳқонобод туманидан ўтувчи 1283-километрида содир бўлган.

 

 

Мутасаддининг қўшимча қилишича, ЙТҲ содир бўлган пайт ҳайдовчи машинада ёлғиз бўлган.

 

“Ҳайдовчи билан суҳбатлашганимизда,  у тоғасиникига кетаётган вақти тоби қочиб, бошқарувни йўқотганини ва оқибатда автоҳалокат содир бўлганини айтди. Шунга қарамасдан, ҳайдовчини шифокор кўригидан ўтказганимизда, ҳушёр ҳолатда бўлгани ва ҳеч қандай спиртли ичимлик истеъмол қилмагани маълум бўлди”, — дейди Баҳром Назаров.

 

Ёш ҳайдовчи  Ж.С.нинг тажрибасизлиги фожеа ёки бир умрлик тузатиб бўлмас хатога сабаб бўлиши мумкин эди. Ҳайриятки, авария ҳолатининг жиддийлигига қарамай, ҳайдовчига зарар етмаган.

 

 

Аввалроқ Қашқадарё вилоятида 20 ёшли ҳайдовчининг эҳтиётсизлиги натижасида 1 ёшли гўдакнинг ўлими қайд этилгани ҳақида ҳам хабар берган эдик.

 

Мавзуни ўрганиш давомида кузатувларимиз шуни кўрсатмоқдаки, ЙТҲларининг аксарияти айнан ёш ва малакасиз ҳайдовчилар билан боғлиқ. Хорижий мутахассисларнинг сўзларига кўра, эндигина “рулга ўтирган” ҳайдовчилар камида 4 йиллик тажрибага эга кишиларга қараганда 1,6 марта кўпроқ ЙТҲга учрайдилар.

 

Амалдаги тартибга кўра мамлакатимизда 18 ёшдан ҳайдовчилик гувоҳномаси берилади. Айнан шу ёшдагилар йўлларда “дрифт” усулидан фойдаланишга, турли қоидабузарликларга ҳам ўч бўлиши бор гап. Шуларни инобатга олган ҳолда, балки гувоҳнома бериш ёшини бироз узайтириш керакдир?!  Мунозара учун танланган мавзуга яна қайтамиз...

 

 

Мафтуна Режаббоева