Россия Қора ва Азов денгизларидаги Украина портларини тўсиб қўйди, бу эса Украина экспортини, хусусан, қишлоқ хўжалиги маҳсулотларини сезиларли даражада камайтирди. Бу, ўз навбатида, дунёнинг кўплаб мамлакатларида озиқ-овқат нархларининг ошишига олиб келди. Бу ҳақда Жаҳон банки билан суҳбатда Украина президенти Владимир Зеленский маълум қилди.
Унинг таъкидлашича, озиқ-овқат нархининг ошиши дунёнинг 81 давлатида сезилади ва бу 47 миллионга яқин одамни очлик ёқасига олиб келади.
"Украина буғдойи, маккажўхори, ўсимлик ёғи ва бошқа маҳсулотларсиз бу нафақат Африка ва Осиёнинг кўплаб мамлакатларида озиқ-овқат танқислиги, балки сиёсий беқарорлик ва, эҳтимол, янги миграция инқирози билан тугайди", — дейди Зеленский.
Шу билан бирга, у мамлакат расмийлари экспортни йўлга қўйиш учун барча имкониятларни ишга солаётганини таъкидлади.
"Биз имкон қадар бу йил экиш кампаниясини бошладик. Аммо дунёда ҳеч ким бу уруш давом этар экан, озиқ-овқат хавфсизлиги кафолатланишига ишонч ҳосил қила олмайди", — деди у.
У урушни тўхтатиш ва Украина ҳудудини рус босқинчиларидан озод қилиш “озиқ-овқат инқирози тарқалишини тўхтатишнинг ягона ишончли йўли” эканини таъкидлади.