Афғонистонда юзини тўлиқ ёпмаган аёллар дўконга киритилиши тақиқланди
Аввал ҳам таълим, давлат идоралари ва ҳатто бозорлар бўйича шунга ўхшаш чекловлар жорий этилган эди.
Афғонистоннинг Ҳирот вилоятида аёллар учун янги чекловлар жорий этилди. “Толибон” ҳаракати вилоятдаги савдо дўконларига юзини тўлиқ ёпмаган аёлларни киритмаслик бўйича кўрсатма берди дейди ExpressAsia.
Маҳаллий ахборотларга кўра, мазкур талаб савдо масканлари эгалари билан ўтказилган йиғилишда эълон қилинган. Эндиликда сотувчилар ҳижоб ёки паранжини тўлиқ тақмаган аёлларга хизмат кўрсатишдан бош тортиши шарт бўлади.
Қайд этилишича, ушбу чоралар аёлларнинг жамоат ҳаётидаги иштирокини чеклашга қаратилган сиёсат доирасида амалга оширилмоқда.
Ҳозирда қизлар учун мактаб ва олий таълим муассасаларида ўқиш таъқиқи ҳануз сақланиб қолган. Аввалроқ шунга ўхшаш чекловлар судлар, шифохоналар, давлат идоралари ҳамда Ўзбекистон билан чегарадаги бозорларга боришга нисбатан ҳам қўлланилганди.
