Алимент тўламай яшириниб юрган эркак холасининг уйидан топилди

Андижонда фарзандининг моддий таъминотидан бўйин товлаб юрган қарздор ота холасининг уйидан топилди. Бу ҳақида Мажбурий ижро бюросининг вилоят бошқармаси хабар берди. 

 

Қайд этилишича, Андижон шаҳрида яшовчи фуқаро Ж.Ю. турмуш ўртоғи билан ажрашган. Суднинг ҳал қилув қарорига кўра, ундирувчи М.Ю. фойдасига бир нафар фарзанди учун ҳар ойда алимент тўлаш белгиланган. 

 

Мазкур ҳужжат Бюронинг Андижон шаҳар бўлими иш юритувига келиб тушган ҳамда ижро ҳаракатлари олиб борилган. Ота алимент пулларини ўз вақтида тўламай келгани учун 2023 йилнинг август ойида маъмурий жавобгарликка ҳам тортилган. 

 

Ж.Ю. шундан сўнг ҳам вояга етмаган фарзанди учун маблағни қизғаниб, алимент тўламай келган ва қарздорлик салкам 13 млн сўмдан ортиб кетган. Бундан ташқари, яшаш манзилига келмасдан яшириниб юришни одат қилган.

 

Шундан сўнг унга нисбатан давлат ижрочиси томонидан қидирув эълон қилинган. Натижада алимент тўлашдан яшириниб юрган ота Булоқбоши туманида яшовчи холасининг уйида яширинча яшаб келаётгани маълум бўлган. 

 

Белгиланган тартиб бўйича қидирувдаги шахс давлат ижрочисига топширилган ва бюронинг Андижон шаҳар бўлими томонидан қарздор Ж.Ю.га нисбатан жиноят иши қўзғатилган.