Андижондаги пахта қабул қилиш масканида ёнғин чиқди
Ҳолат юзасидан вазирлик маълумот берди.
Ижтимоий тармоқларда Андижон вилояти Балиқчи туманидаги пахта тайёрлаш пунктларининг бирида хирмонга уйилган пахталар ёниб кетгани ҳақида хабар тарқалди. Ҳолат юзасидан Қишлоқ хўжалиги вазирлиги расмий муносабат билдирди.
16 октябрь куни Балиқчи тумани «Насриддинобод» МФЙда жойлашган «Tetratex» МЧЖга қарашли пахта қабул қилиш масканида 12 кг пахта хом-ашёси ёниб кетган.
Ёнғин электр кабелларидаги носозлик туфайли қисқа туташув келиб чиқиши натижасида юзага келган.
Ёнғин натижасида Андижон-36 навли 1 сорт 2 синфга кирувчи пахтанинг юза қисми ёнган, «Tetratex» МЧЖ раҳбари томонидан тадбиркорга маҳсулотга етказилган зарар аниқланиб, тўлиқ қоплаб берилган.
