Фоҳишаликка жалб этишмоқчи бўлди: Тошкент аэропортида одам савдосининг олди олинди
Гумонланувчи жабрланувчига чет элда мўмай даромад топишни ваъда қилган.

Тошкент халқаро аэропортида 26 ёшли Оҳангарон шаҳрида яшовчи аёлни жинсий эксплуатация қилиш мақсадида Туркияга юборишга уриниш фош этилди. Бу ҳақда Тошкент вилояти Ички ишлар бош бошқармаси хабар берди.
Маълум қилинишича, ҳолат «Хавфсиз ва соғлом юрт» кенг кўламли тезкор-профилактик тадбирининг учинчи босқичи доирасида ИИВ ва Давлат хавфсизлик хизмати ходимлари ҳамкорлигида аниқланган.
Тезкор тадбир давомида Олмалиқ шаҳрида яшовчи аёл қўлга олинган. Тергов маълумотларига кўра, у Истанбулда яшовчи таниши билан олдиндан тил бириктириб, Оҳангарон шаҳрида яшовчи аёлни алдов йўли билан Туркияга юборишга уринган.
Гумонланувчи жабрланувчини чет элда мўмай даромад топишига ишонтириб, уни Истанбулга шаҳвоний эксплуатация ва фоҳишалик мақсадида олиб кетаётган вақтда аэропортда далилий ашёлар билан ушланган. Жабрланувчини Истанбулда бошқа бир ўзбекистонлик аёл кутиб олиши керак бўлган.
Мазкур ҳолат юзасидан Жиноят кодексининг 135-моддаси (одам савдоси) билан жиноят иши қўзғатилган. Ҳозирда тергов ҳаракатлари олиб борилмоқда.








