Байрам кунларида ҳам вакцинация жараёнлари давом этади — ССВ
Ўзбекистонда дам олиш кунлари деб эълон қилинган 1-5 сентябрь саналарида ҳам соат 8:00 дан 20:00 га қадар эмлаш тадбирлари давом эттирилади. Бу ҳақда Соғлиқни сақлаш вазирлиги ахборот хизмати хабар берди.
Маълум бўлишича, байрам тантаналари ўтказиладиган жойларда малакали тиббий хизмат кўрсатиш бўйича тун-у кун навбатчилик ташкил этилади.
“Шунингдек, байрам кунлари юртимиздаги барча даволаш муассасаларида, ҳудудий оилавий шифокор пунктлари, оилавий поликлиникалар, кўп тармоқли марказий поликлиникаларда белгиланган тартибда байрам кунлари 08:00 дан 20:00 гача фаолият кўрсатадиган шифокор ва ҳамширалардан иборат навбатчи бригадалар тузилиши белгиланди. Шошилинч тиббий ёрдам тизими муассасалари ва “тез ёрдам” хизмати одатдаги тартибда бир маромда узлуксиз ишлайди. Хусусан, Республика шошилинч тиббий ёрдам илмий маркази, унинг ҳудудларда 13 та филиали, туман ва шаҳар тиббиёт бирлашмалари тизимидаги барча бўлимлари фаолият кўрсатади.
Мамлакатимиздаги эпидемиологик вазиятни ҳисобга олган ҳолда эмлаш пунктлари фаолияти байрам кунлари ҳам давом эттирилади”, дейилади хабарда.
Эслатиб ўтамиз, Нурмат Отабеков "Ўзбекистонда фуқаролар коронавирусга чалинган ёки чалинмаганидан қатъи назар, эмланиши шарт", - дея таъкидлаганди.
