Фуқаролик ишлари бўйича Беруний туманлараро судининг 2020 йил 17 сентябрдаги ижро варақасига асосан, жавобгар Д.Р.дан даъвогар Б.С.нинг фойдасига 45 миллион 669,8 минг сўм автоулов учун тўланган пули ва 1,8 миллион сўм суд ҳаражатини ундириш тўғрисида ижро варақаси Бюронинг Беруний туман бўлими иш юритувига келиб тушган. Бу ҳақда МИБ Жамоатчилик билан алоқалар ва ҳуқуқий ахборот бўлими бошлиғи Фаррух Тошпўлатов Zamon.uz'га хабар қилди.
Маълум бўлишича, давлат ижрочиси томонидан шу куннинг ўзида ижро иши қўзғатилган бўлиб, мажбурий ижро ҳаракатларига киришган. Ижро ҳужжатида кўрсатилган талабларни ихтиёрий равишда бажариш учун жавобгар Д.Р.га 15 кунлик муддат берилиб, мол-мулкларини аниқлаш мақсадида тегишли ташкилотларга сўровномалар юборилган. Oлинган жавоб хатларига асосан жавобгарнинг номида "Lacetti" автоулови борлиги аниқланган. Жавобгар томонидан ижро ҳужжати талаблари ихтиёрий муддатда бажармагани сабабли, мазкур автомашина хатловга олинган.
Айтилишича, хатланган автомобиль кимошди савдосида бошланғич сотув нарҳи 65 миллион 746,2 минг сўм билан “Е-IJRО AUKSION” ягона электрон савдо майдончаси орқали савдога чиқарилиб сотилган.
Сотувдан тушган пул маблағлари даъвогар Б.С.га тўлиғи билан амалда ундирилиб, мазкур ижро “Суд ҳужжатлари ва бошқа органлар ҳужжатларини ижро этиш тўғрисида”ги Қонуннинг 41-моддасига асосан тамомланган.
Эслатиб ўтамиз, аввалроқ Олтиариқда фуқаронинг “Nexia 3” русумли автоулови, қарздорнинг “Trailblazer” автомашинаси, шунингдек, Бухорода қарздорларнинг машинаси хатлангани ҳамда МИБ томонидан 742 минг 476 та ижро ҳужжатининг муддати бузилган ҳолда ижро этилгани ҳақида хабар берилганди.