Блогер Олимжон Ҳайдаров қўлга олинди
Блогер ҳуқуқ-тартибот органлари томонидан товламачиликда гумонланиб қўлга олинди.
Фарғона ИИБнинг хабар беришича, 29 июль куни вилоят ҳуқуқ-тартибот органлари томонидан ўтказилган тезкор тадбир жараёнида, ўзини мустақил блогер деб таништирган фуқаро Олимжон Ҳайдаров товламачилик устида қўлга олинди.
Аниқланишича, Олимжон Ҳайдаров 12 июнь куни «Қўқон Истиқлол» савдо комплексида норасмий савдо фаолияти билан шуғулланган тадбиркорларнинг ишончига кириб, уларда норозилик кайфиятини уйғотиш орқали, савдо комплексларидаги реконструкция ишлари бўйича салбий мазмундаги мақолаларни ўзига тегишли ижтимоий тармоқда жойлаштирган.
Шунингдек, блогер «Қўқон Истиқлол» савдо комплекси МЧЖ расмийларидан товламачилик йўли билан моддий маблағ ундиришга уриниб, ўзи томонидан тайёрланган «Қўқонда ҳуқуқий демократик бошқарувми ёки шаръий бошқарувми?» номли салбий мазмундаги мақолани ижтимоий тармоқларда тарқатмаслик эвазига, 10 минг АҚШ долларини товламачилик йўли билан талаб қилиб, 7,5 минг АҚШ долларини қўлга киритиб, қўшимча 2,500 минг АҚШ долларини олаётган вақтида тезкор тадбир иштирокчилари томонидан қўлга олинган.
Ҳозирда мазкур ҳолат юзасидан Қўқон шаҳар ИИБ томонидан терговга қадар текширув ҳаракатлари олиб борилаётгани маълум қилинган.
