Ўзбекистон Республикаси герби ҳамда “Ўзбекистон – Мустақилликка 33 йил” ёзуви туширилган “Дунёдаги энг катта эбру тасвири”ни яратиш орқали жаҳон рекорди ўрнатилди.
Мутахассислар таъкидлашича “Абри баҳор” ёки “Эбру” санъати бу сув юзасига махсус бўёқ билан тасвирлар чизиш бўлиб, ҳосил бўлган шакллар ва безаклар қоғоз ёки матога кўчириб ўтказилади. Жараён тугал амалга оширилиши учун рассомдан катта маҳорат, билим ва тажриба талаб қилади.
Ушбу Эбру тасвири бўйича янги рекорд Туркияда истиқомат қилувчи, асли ўзбек рассоми ва Эбру санъати устаси Ахмед Чоктан томонидан ўрнатилди. Қоғозга туширилган тасвирнинг эни 1,61 метр ва узунлиги 12,96 метр бўлиб, жами 20,86 кв.метрни ташкил этади. Аввалги энг катта Эбру тасвири (16,5 кв.метр) жаҳон рекорди 2009 йилда Қатарда ўрнатилган ва 15 йил ўтиб Ўзбекистонда янгиланди.