Россия нефть экспортига зарба: Украина Самара вилоятидаги станцияни нишонга олди
Украина ҳарбийлари ушбу объектни Россиянинг урушни молиялаштираётган нефть саноати учун муҳим инфратузилма деб атаган.
Украина Қуролли кучлари Бош штаби Самара вилоятидаги нефть транспорти инфратузилмасига дронлар орқали зарба берилганини маълум қилди. Ҳарбийлар ҳужум оқибатида нефть сақланадиган бир нечта резервуарда ёнғин чиққанини билдирди.
Бош штаб баёнотига кўра, нишонга олинган станция Россия нефть саноатининг муҳим объектларидан бири ҳисобланади. Унга Татаристон, Ғарбий Сибирь ва мамлакатнинг бошқа нефть қазиб олувчи ҳудудларидан магистраль қувурлар орқали хомашё етказилади. Станцияда турли таркибдаги нефть аралаштирилиб, Россиянинг асосий экспорт маркаларидан бири — Urals шакллантирилади.
Украина ҳарбийлари ушбу объектни Россиянинг урушни молиялаштираётган нефть саноати учун муҳим инфратузилма деб атаган.
13 ноябрь куни Самара вилояти губернатори Вячеслав Федоришчев саноат корхонасига берилган зарба оқибатида тўрт киши ҳалок бўлганини маълум қилган. Бироқ у ҳужум қайси корхонага қаратилганига аниқлик киритмаган.
Маълумот учун, 30 октябрь куни Украина Самара вилоятидаги Новокуйбишевск нефтни қайта ишлаш заводига ҳам ҳужум қилган эди. Шундан сўнг Россиядаги нефтни қайта ишлаш заводларига зарбалар қайта кучайган.
Украина Бош штаби жорий ҳафта мамлакатдаги бешта йирик нефтни қайта ишлаш заводи — Омск, Ленинград, Рязань, Нижний Новгород ва Ярославль вилоятларидаги корхоналар сўнгги кунларда ҳужумга учраганини билдирган.
