Европа Иттифоқидан Украинага рекорд ёрдам: 7,9 млрд евро ажратилди
Маблағ 20 дан ортиқ ислоҳот чораларини амалга ошириш шарти билан ажратилган.

Европа Комиссияси Украинага молиявий эҳтиёжларини қоплаш ва давлат бошқаруви тизими фаолиятини қўллаб-қувватлаш учун 7,9 миллиард евро миқдорида маблағ ажратди. Европа Комиссияси президенти Урсула фон дер Ляйен ушбу тўлов Европа Иттифоқи томонидан Украинага ҳозиргача тақдим этилган энг йирик бир марталик молиявий ёрдам эканини маълум қилган.
Унинг сўзларига кўра, Брюссель Украинанинг Европа интеграциясига интилишини қўллаб-қувватлашда давом этади. Фон дер Ляйен ажратилган маблағни рекорд даражадаги тўлов деб атаб, бу ёрдам ислоҳотлардаги аниқ натижалар билан боғлиқлигини таъкидлаган.
Маълум қилинишича, 16 ноябрь куни Европа Иттифоқи Кенгаши Украинага 8 миллиард евро ажратишни маъқуллаган. Маблағларнинг қарийб 5 миллиард евроси 2026 йил учун Украинани қўллаб-қувватлаш кредитидан йўналтирилади.
Молиявий ёрдамни олиш учун Украина суд тизимини ислоҳ қилиш, коррупция ва пул ювишга қарши кураш, давлат активларини бошқариш, молия бозорлари, энергетика, қишлоқ хўжалиги, рақамли трансформация ҳамда атроф-муҳитни муҳофаза қилиш каби йўналишларда 20 дан ортиқ мақсадли ислоҳот чораларини амалга оширган.
Украина механизми 2024 йил 1 мартда ташкил этилган бўлиб, 2027 йилгача мамлакатни тиклаш, қайта қуриш ва модернизация қилиш учун 50 миллиард евродан ортиқ грант ва кредит ажратишни назарда тутади. Ушбу маблағларнинг 40 миллиард евродан ортиғи “Украина режаси” доирасида ислоҳотлар ва инвестицияларни амалга оширишга йўналтирилган.








