Чанг бўрони туфайли "Tез ёрдам"га чақириқлар сони ошди

 

Жорий йилнинг 4-6 ноябрь кунлари мамлакатимизнинг айрим ҳудудларида, хусусан, Тошкент шаҳрида мавсумга хос бўлмаган чанг-қумли бўрон ҳодисаси кузатилиб, бунинг оқибатида атмосфера ҳавосидаги чанг миқдори белгиланган меъёрдан 5 баробар, куннинг айрим вақтларида эса 30 баробар ошгани кузатилди.

 

Ушбу ҳолат юзасидан Соғлиқни сақлаш вазирлигининг алоҳида назорати ташкил этилиган бўлиб, “Тез ёрдам” хизмати томонидан аҳолига зарур тиббий ёрдам кўрсатиш чоралари кўрилмоқда.

 

Тошкент шаҳар тез тиббий ёрдам станцияси бош шифокори Дониёр Бўрибаевнинг сўзларига кўра, 4 ноябрь куни “Тез ёрдам” хизматига қилинган чақириқлар сони 4082 тани ташкил этиб, 3 ноябрь ҳолатидан 649 тага ошган.  5 ноябрдан 6 ноябрь соат 06.00 гача умумий чақириқлар сони 4110 тага етиб, нафас олиш билан боғлиқ мурожатлар сони 709 тани ташкил қилган. Бу кўрсаткич жами чақириқлар сонининг 17,2 фоизига тенг.   Шундан аллергик реакциялар билан 36 та, бронхиал астма ҳуружи билан 122 та мурожаат келиб тушган. Уларнинг 11 таси госпитализация қилинган.

 

Юртдошларимизга бундай ноодатий ва ноқулай об-ҳаво шароитида "1003" қисқа рақамли  Саll-марказининг малакали мутахассисларидан чангли ҳаводан қандай ҳимояланиш бўйича туну-кун керакли маслаҳат ва тавсиялар олишлари таклиф қилинади.

 

Маълумот учун, мутахассислар ҳаводаги зарарли чанг-ғубор яқин кунлар ичида ҳам сақланиб қолишини ва 12 ноябрга қадар ёғингарчилик кутилмаётганини таъкидламоқда. Қолаверса, “Ўзгидромет” сўнгги 150 йил ичида Ўзбекистонда бундай ҳодиса кузатилмаганини маълум қилди.

 

Аввалроқ, мамлакатимиз Президенти Шавкат Миромонович Мирзиёевнинг кузатилаётган ноодатий об-ҳаво юзасидан билдирган фикрлари ҳамда 4 ноябрь куни 678 киши нафас қисиши туфайли "Тез ёрдам"га мурожаат қилгани ҳақида хабар берилганди.

 

Мафтуна Режаббоева