Чет элдан келган фуқаронинг “ҳийласи иш бермади”

 

 

 “Тошкент-АЭРО” ихтисослаштирилган божхона комплексининг Контрабандага қарши курашиш ва божхона аудити бўлими тезкор вакиллари томонидан (аввалдан олинган маълумотларга асосан) “Истамбул-Тошкент” йўналиши бўйича учиб келиб, “яшил” йўлак орқали ҳаракатланган фуқаро К.С.нинг юклари божхона кўригидан ўтказилди. Оқибатда, унинг юклари ичида умумий қиймати тахминан 78 650 000 сўмга тенг 513 дона турли хил дори воситалари борлиги аниқланди.

 

Шунингдек, Тошкент вилояти божхона бошқармаси Контрабандага қарши курашиш бўлими бошчилигида Тошкент вилояти Оҳангарон тумани ҳудудида олиб борилган тезкор тадбирда ҳам ноқонуний дори воситалари “манзили”га етиб бормади.

 

Фуқаро Ю.Ш. бошқарувидаги “Damas” русумли автоуловда олиб келинган, Ўзбекистон фуқароси С.И.га тегишли бўлган умумий қиймати 180 000 000 сўмлик, 6 000 қути  “Cefoperazone”  номли дори воситаларини “шартли харидор”га сотилаётган вақтида ходимлар томонидан тўхтатиб қолинди.

 

Ҳозирда мазкур ҳолатлар юзасидан божхона органлари томонидан  суриштирув ҳаракатлари давом эттирилмоқда.

 

Эслатиб ўтамиз, аввалроқ Оҳангарон туманида жойлашган «Чинор» мунтазам йўл патруль хизмати масканида ноқонуний дори воситаларининг олди олингани ҳамда Зангиоталик фуқаро 91,5 миллион сўмлик «Ремдесивир» дори воситасини 12 минг долларга сотишга урингани ҳақида хабар берилганди.

 

 

Баҳринисо Мадумарова тайёрлади.