Фарҳод ва Ширин судда ютқазди
Улар муаллифлик ҳуқуқини бузгани учун жарима тўлашади.
Шоир Бобур Бобомурод шу йилнинг 28 январь куни Жиноят ишлари бўйича Юнусобод туман судига Фарҳод ва Шириннинг муаллифлик ҳуқуқига оид қонунни бузаётгани тўғрисида ариза билан мурожаат қилган.
Маълум қилинишича, Ф. Сулаймонов ва Ш. Зоитова Б. Бобомуродга тегишли “Фарҳод ва Ширин” товар белгисидан муаллиф рухсатисиз фойдаланаётган бўлишган.
Бундан ташқари, хонандалар 2021 йилнинг 16 декабрь куни “Туркистон” санъат саройида бўлиб ўтган концертда аризачига тегишли “Қалбим баҳори” ва “Ҳаёт” номли шеърларни унинг розилигисиз қўшиқ қилиб ижро этишган.
Суднинг 14 февраль кунги қарорига биноан, Ф. Сулаймонов ва Ш. Зоитовага МЖТКнинг 177-моддаси 1-қисми, 177-1-моддаси 1-қисми билан базавий ҳисоблаш миқдорининг 5 баравари (1 350 000 сўм) миқдорида жарима жазоси тайинланган.
