Ҳиндистондан буғдой олиб чиқиш тақиқланди
Аввалроқ Деҳли дунёнинг энг йирик дон экспортчисига айланишни мақсад қилганди.
Ҳиндистон буғдой экспортини тақиқлаб қўйди. Бу ҳақда Reuters агентлиги хабар берди.
Ушбу қарор кучга кирган ва ғалла нархининг ошиши фонида қабул қилинган. Фақатгина аввалдан келишувга эга давлатларгагина буғдой етказиб берилади.
Ҳиндистон дунёда буғдой етиштириш бўйича етакчи давлатлардан ҳисобланади. Аммо унинг катта қисми ички истеъмолга йўналтирилади.
Бундан олдин Деҳли Россия-Украина можароси туфайли юзага келган дон бозоридаги бўшлиқни тўлдиришини ва жаҳоннинг энг йирик буғдой экспортёрига айланишини эълон қилганди. Март ойида Ҳиндистон энг йирик ғалла импортёри – Мисрга дон етказиб бериш бўйича келишувга эришганди.
Аввалроқ Қозоғистон ҳам буғдой ва ун экспортига чеклов ўрнатганди.
