Унда сўзга чиққанлар, хусусан, Ўзбекистон Кинематография агентлиги бош директори Фирдавс Абдуҳолиқов ҳам мамлакатимизда қайта тикланган Тошкент халқаро кинофестивали ўзбек киносини ривожлантиришда муҳим омил бўлганини таъкидлади.
Анжуманда иштирокчи давлатлар вакиллари ижод аҳлининг ўзаро ҳамкорлигига имкон яратиш борасидаги амалий ғамхўрлиги учун Президентимиз Шавкат Мирзиёевга миннатдорлик билдирдилар.
Муҳтарам Шавкат Миромонович,
Аввало, афсонавий Тошкент Халқаро кинофестивалининг қайта тиклангани муносабати билан Сизга самимий миннатдорчилигимизни изҳор этишга ижозат бергайсиз.
Тошкент шаҳри шу кунларда жаҳон кино санъатининг муҳим маданий марказига айланди.
Тарихда “Осиё Африка ва Лотин Америкаси мамлакатларининг Тошкент кинофестивали” номини олган санъат анжуманини жаҳон киноси вакиллари ва мухлислари ёқимли хотиралар билан эслашади.
Тошкент кинофестивали ўз тарихи давомида турли мамлакатлар кино усталар ўртасида мулоқот майдонига айланди, кўплаб кино дурдоналарни, кино юлдузларини кашф этди. Мазкур кинофестиваль сабабли Тошкент турли халқлар, давлатлар, маданиятлар ўртасидаги дўстлик ва ҳамкорлик тимсолига айланди. Бироқ, афсуски, 1997 йилдан сўнг бу эзгу анъана тўхтаб қолган эди.
Салкам чорак асрлик танаффусдан сўнг Сизнинг ташаббусингиз билан қайта тикланган “Ипак йўли дурдонаси” Ўн учинчи Тошкент халқаро кинофестивали дунёнинг элликка яқин мамлакатидан келган киноижодкорларни бирлаштирди.
Бир ҳафта давомида жаҳон киносининг сўнгги йилларда яратилган сара намуналари Ўзбекистон экранларида намойиш этилди, дунё кинематографиясида кечаётган ўзгаришлар хусусида фикр алмашилди, маҳорат дарслари ташкил этилди. Фестиваль пандемия боис бир-бирини узоқ вақт кўрмаган, соғинган инсонларга дийдор бахш этди.
Муҳтарам Шавкат Миромонович,
Ижозатингиз билан, XIII Тошкент Халқаро кинофестивали иштирокчилари номидан юксак эътибор ва шарт-шароитлар учун Сизга яна бир бор самимий ташаккур билдирамиз, Сизга сиҳат-саломатлик, Янги Ўзбекистон тараққиёти ва келажаги йўлидаги саъй-ҳаракатларингизда улкан-муваффақиятлар, шунингдек қайта тикланган кинофестивалининг умри узоқ бўлишини тилаб қоламиз.
Камоли эҳтиром ила,
“Ипак йўли дурдонаси” XIIIХалқаро Тошкент кинофестивали иштирокчилари
Матбуот анжуманида сўнгида Ўзбекистон Кинематография агентлиги ҳамда Беларуссия ва Қирғизистон давлатлари кино тузилмалари ўртасида ҳамкорлик меморандуми имзоланди.
Юлдуз Рустамова