Иш ҳақи ва нафақа пулларининг 3,7 миллиард сўми талон-тарож қилинган
Бу ҳақида Бош прокуратура маълум қилди.
АОКАда ўтказилган брифингда Бош прокуратура ахборот хизмати раҳбари Ҳаёт Шамсуддинов Бош прокурорнинг мамлакатимиз аҳолисига йўллаган мурожаатида қайд этилган масалалар ижроси юзасидан амалга оширилган ишлар ҳақида маълумот берди:
Ўтказилган ўрганишларга кўра, 3087 та янги иш ўрни ҳисоботларга қўшиб ёзилгани аниқланиб, айбдор шахслар тегишли жавобгарликка тортилди.
Иш ҳақи ва нафақа пулларининг 3,7 миллиард сўми талон-тарож қилинган. Мазкур ҳолат бўйича 34 та жиноят иши қўзғатилди.
Шунингдек, хорижий инвесторлар фаолиятида юзага келган 1644 та муаммо ижобий ҳал этилди.
Прокуратура органларининг аралашуви билан қарздорликларнинг 6,4 трлн. сўми амалда ундирилди, 5,7 триллион сўмлик кредитлар бўйича гаровдаги мулкларнинг сотувга чиқарилиши таъминланди. Бундан ташқари, 1,2 триллион сўмлик ижро ҳужжатлари бўйича ундирув қарздорларнинг иш ҳақига қаратилди.
Ўтказилган назорат тадбирларида кредит маблағларининг 1,5 триллион сўми талон-торож қилинганлиги аниқланиб, банк ва мижоз корхоналар раҳбарларига нисбатан 540 та жиноят иши қўзғатилди.
