Исроил ва Ливан ўртасидаги зиддият яна авж олди

 

Исроил армияси Ливан жанубидаги «Ҳизбуллоҳ» ҳаракатининг позицияларига ҳаво ҳужумлари уюштирди. Бу ҳужумлар Ливандан Исроилга қарата ракеталар отилганидан сўнг амалга оширилгани айтилмоқда.

 

Исроил қўмондонлиги маълумотига кўра, зарбалар «Ҳизбуллоҳ»га тегишли ҳарбий объектлар ва қўмондонлик марказларига қаратилган. Ливан Соғлиқни сақлаш вазирлиги эса икки киши, жумладан бир бола ҳалок бўлганини, саккиз киши яраланганини маълум қилди.

 

«Ҳизбуллоҳ» Исроилга ракета ҳужуми уюштирганини рад этиб, ўт очишни тўхтатиш келишувига риоя қилаётганини таъкидлади. Шу билан бирга, Ливан армияси мамлакат жанубида ракета учиришга мўлжалланган учта мосламани йўқ қилганини билдирди.

 

Бу зарбалар АҚШ ва Франциянинг ўт очишни тўхтатиш бўйича олиб бораётган музокаралари давомида содир бўлди. Сулҳ шартларига кўра, Ливан армияси жанубдаги назоратни кучайтириши, «Ҳизбуллоҳ» жангчиларини шимолга олиб чиқиши ва Исроил ҳарбийлари Ливан ҳудудидан чекиниши керак.

 

Бироқ, Исроил «Ҳизбуллоҳ» кучларини қайта қуролланишига йўл қўймаслик учун зарбаларни давом эттиришини билдирган. Бу воқеалар Исроилнинг Ғазо секторида «Хамас»га қарши ҳарбий ҳаракатларни қайта бошлаганидан бир неча кун ўтиб содир бўлди.