Избосканда иш вақтида креслога ётиб олиб, Тиктокда видео томоша қилган ҳоким ёрдамчиси вазифасидан озод қилинди

Ижтимоий тармоқларда Андижон вилоятининг Избоскан  туманида ҳоким ёрдамчиси иш вақтида креслода ётиб олиб, Тиктокда видео томоша қилгани акс этган хабар тарқалди. Ҳолат юзасидан туман ҳокимлиги матбуот хизмати расмий муносабат билдирди.

Маълум қилинишича, видеоматериал жорий йилнинг 6 июнь куни Йўлдошев Муҳаммадюсуф томонидан тасвирга олинган. Унда ҳоким ёрдамчиси Умирзақов Хожимурод ҳокимият ички тартиб-қоидаларига зид тарзда этика ва эстетика қоидаларига амал қилмай, хужжатларнинг сочилган ҳолатларига ҳам қарамай ўтирган жараёни кўрсатилган. Мана шу ҳолат эса тасвирга ёзиб олинган ва 15 июнь куни турли тармоқларда айланишни бошлаган.

“Шу ўринда оддий ҳақиқатни ҳам айтиш лозимки, ерда сочилган турли хужжатлар тасвирга олувчи томонидан туширилган. Тасвирчининг бу ҳолатни ўз бўйнига олган аудио ёзувлари мавжуд”, — дейилади хабарда.  

Ҳолат юзасидан туман ҳокими С. Исмоилов 16 июнь куни ҳокимият тизимида фаолият кўрсатаётган барча ходимлар (ўринбосарлар, бўлим бошлиқлари, шўъба мудирлари, мутахассислар ҳамда техник ходимлар) учун йиғилиш ўтказган. Туман ҳокими мазкур ҳолат барчага дарс бўлишини, туман ҳокимияти биноси ҳудудида тартиб-қоида ҳамда этика ва эстеътика қоидаларига қатъий амал қилиш, кучли интизомни шакллантириш, туман ҳокимяти биносига келувчи барча фуқаролар билан соғлом муомала маданиятини кучайтириш кераклиги бўйича кўрсатма-топшириқлар берган. 

Йиғилиш сўнггида бундай ҳолатни такрорламаслиги учун барча қатъий огоҳлантирилган ва якуний қарор эълон чиқарилган. Унга кўра, ҳоким ёрдамчиси лавозимида фаолият юритиб келаётган Хожимурод Умирзоқов эгаллаб турган лавозимидан озод этилган.