27 та концерт рекламаси бўйича огоҳлантириш берилди: ижро шакли кўрсатилмаган
Концерт-томоша тадбирларида фонограммадан фойдаланиш ҳақида ахборот берилиши шарт.

Рақобат қўмитаси Instagram саҳифалари ва ташқи реклама объектларида жойлаштирилган 27 та концерт рекламасида фонограмма ёки жонли ижро ҳақида маълумот берилмаганини аниқлади.
Ўрганиш давомида Лолита, Ани Лорак, Маёт, Николай Фоменко, Иззат Шукуров, «Уммон» гуруҳи, Райҳон Ғаниева ва Ғайбулла Турсунов концертларининг Instagram рекламаларида, шунингдек, Toxi$, «Машина времени» ва Отар Кушанашвили иштирокидаги дастурларнинг ташқи рекламаларида қонунбузилиш ҳолатлари қайд этилди.
Қўмита реклама берувчиларга рекламаларни қонунчилик талабларига мувофиқлаштириш бўйича огоҳлантиришлар юборган.
Вазирлар Маҳкамасининг 2025 йил 8 апрелдаги 207-сон қарорига мувофиқ, концерт рекламасида ижро шакли «Жонли ижро», «Фонограммадан фойдаланган ҳолда жонли овоз» ёки «Фонограммали концерт дастури» каби аниқ иборалар билан кўрсатилиши керак.
«Реклама тўғрисида»ги қонуннинг 44-моддасига кўра, фонограммадан фойдаланилганда, рекламada унинг қўлланиш даражаси ҳам акс эттирилиши лозим. Ташқи рекламалар учун бу маълумот реклама майдонининг камида 10 фоизини эгаллаши керак. Шунингдек, ташкилотчилар томоша бошланишидан олдин бу ҳақда аудио хабардор қилишлари шарт.
«Истеъмолчилар ҳуқуқларини ҳимоя қилиш тўғрисида»ги қонуннинг 6-моддасида ҳам концерт-томоша тадбирларида фонограммадан фойдаланиш ҳақида ахборот бериш белгиланган.
Рақобат қўмитаси концерт ташкилотчилари ва реклама берувчиларни қонунчилик талабларига риоя қилишга чақирди. Талаблар бузилиши давом этса, белгиланган тартибда тегишли чоралар кўрилиши мумкин.








