Фильтрлар ўрнатилмаган, чиқиндилар назорат қилинмаган: Тошкентдаги корхонада қоидабузарликлар аниқланди
Ҳозирда корхона фаолиятини вақтинча тўхтатиб туриш масаласида судга мурожаат қилиш учун ҳужжатлар тайёрланмоқда.

Экология ва иқлим ўзгариши миллий қўмитаси Экополиция ходимлари фуқаролар мурожаатлари асосида RP МЧЖ фаолиятини текширди. Бу ҳақда қўмита матбуот хизмати хабар берди.
Маълум бўлишича, корхона қайта ишланган материаллардан полиэтилен гранулалар ишлаб чиқаради. Текширув давомида унинг фаолиятида атмосфера ҳавосини муҳофаза қилиш бўйича қатор талаблар бузилгани аниқланган.
Хусусан, корхона ифлослантирувчи моддалар чиқиндиларини ихтисослаштирилган лаборатория ёрдамида мунтазам мониторинг қилиб бормаган. Шунингдек, чанг ва газни тозалаш ускуналари ўрнатилмаган ҳамда экологик экспертиза талабларига риоя қилинмаган.
Текширув жараёнида ҳаводан намуналар олиниб, лаборатория таҳлиллари ўтказилган. Натижаларга кўра, ҳаводаги азот диоксиди ва чанг миқдори белгиланган меъёрлардан ошиб кетган.
Бундан ташқари, корхонада чиқиндиларни вақтинча сақлаш учун махсус идишлар мавжуд эмаслиги аниқланган.
Қайд этилишича, корхона «Атроф-муҳитни муҳофаза қилиш тўғрисида», «Атмосфера ҳавосини муҳофаза қилиш тўғрисида» ҳамда «Чиқиндилар тўғрисида»ги қонунлар талабларини бузган.
Аниқланган ҳолатлар юзасидан корхонага атмосфера ҳавосини ифлослантиргани учун қўшимча компенсация тўлови ҳисобланган. Маъмурий ҳуқуқбузарлик тўғрисида баённома тузилиб, тегишли материаллар судга юборилган. Шунингдек, қоидабузарликларни бартараф этиш бўйича беш банддан иборат мажбурий кўрсатма берилган.
Ҳозирда корхона фаолиятини вақтинча тўхтатиб туриш масаласида судга мурожаат қилиш учун ҳужжатлар тайёрланмоқда.








