Тожикистонда электр узатиш устуни қулади: Фарғона водийсининг айрим жойларида электр чекланади
Ноқулай об-ҳаво электр узатиш тармоғи таянчларидан бирининг қулашига сабаб бўлди.

19 ноябрь куни соат 06:19 да Сирдарё иссиқлик электр станциясидан Фарғона водийси вилоятларига электр энергияси етказиб берувчи, Тожикистон ҳудудидан ўтувчи 500 кВ кучланишли «L-503» электр узатиш тармоғида ноқулай об-ҳаво сабаб авариявий узилиш юз берди. Бу ҳақда Энергетика вазирлиги маълум қилди.
Дастлабки маълумотларга кўра, ноқулай об-ҳаво таъсирида мураккаб рельефли адирлик ҳудудида жойлашган электр узатиш тармоғи таянчларидан бири қулаган. Натижада автоматик ҳимоя тизими ишга тушиб, мазкур тармоқ орқали электр энергияси узатиш вақтинча тўхтаган. Оқибатда айрим истеъмолчиларда электр таъминотида узилишлар кузатилган.
Айни пайтда «Ўзбекистон миллий электр тармоқлари» АЖ мутахассислари ва авария-тиклаш бригадалари ҳодиса жойига сафарбар этилган. Тожикистоннинг тегишли ташкилотлари билан ҳамкорликда авария оқибатларини бартараф этиш ва электр узатиш тармоғи фаолиятини тиклаш ишлари олиб борилмоқда.
Таъмирлаш-тиклаш ишлари якунлангунга қадар Фарғона водийси вилоятларининг айрим ҳудудларида электр таъминотига вақтинчалик чекловлар киритилади.
Вазирлик маълумотига кўра, Фарғона водийсига электр энергияси бошқа тармоқлар орқали ҳам етказиб берилади. Хусусан, Фарғона вилоятига Тошкент вилоятидаги «Янги Ангрен» иссиқлик электр станциясидан чиқувчи 500 кВ кучланишли «L-524» тармоғи орқали ҳам электр узатилади.
Вазият Энергетика вазирлигининг доимий назоратида. Электр таъминотидаги узилишларни имкон қадар қисқа муддатда бартараф этиш ва истеъмолчиларни барқарор электр энергияси билан таъминлаш чоралари кўрилмоқда.
Тиклаш ишлари ва электр таъминотидаги ўзгаришлар ҳақида қўшимча ахборот бериб борилади.








