Одамларни энг кўп актёрларнинг кийимлари қизиқтиради. Одатда, актёрларга либосларни бирор бир дизайнерлик фирмаси реклама мақсадида тақдим этади. Съёмкалардан кейин эса улар махсус дўкон пештахталарига жўнатилади ёки кимошди савдосига қўйилади. Лекин либосларнинг аксарияти ғойиб бўлади. Масалан, “Ралей” студиясидан умумий миқдори 63 минг долларли дизайнерлик буюмлари йўқолган.
“Юлдузли йўл” телесериали
Полиция “Юлдузли йўл” телесериали тасвирга олиш майдонидан ўғирланган буюмларни икки йилдан буён қидиради. Ўмарилганларнинг атиги учдан бир қисми топилди, холос. Улар ичида “Warner Brothers” студиясида ғойиб бўлган Бэтмен костюми ҳам бор эди.
“Юлдузли жанглар”
“Юлдузлар жанги” фильмини суратга олиш майдончасидан лазерли қилич ва ахлат қутиларидан ясалган андроид роботлар ўмарилган. Бу, айниқса, ахлат қутиларини севувчи Лукаснинг ғазабини келтирган.
“Шляпадаги мушук”
“Шляпадаги мушук” фильми сьёмка майдонидан 55 минг долларлик буюмлар ўғирланади. Ўмарилган нарсалар орасида икки метрли кўк кўзойнак, бир метрли калит, гольф учун мўлжалланган бир метрли байроқ ва 60 килограммли копток бор эди.
“78 параграф”
“78 параграф” фильми баҳайбат реклама суратидан айрилиб қолади. Уни “Садовое кольцо” кўчасидан ўғирлаб кетишади. Унинг ўлчами 60х20 метр бўлган.
“Гарри Поттер”
“Гарри Поттер” фильмини суратга олиш жараёнида ўғирланган 1962 йилги “Ford Anglia” автомобили ҳам катта шов-шувга сабаб бўлади. Унда бош қаҳрамонлар — Гарри ва Рон учган эди. Энг қизиғи, “Форд” мутлақо бузуқ бўлиб, ҳатто, мотори ҳам бўлмаган! Ундан ҳам ҳайратланарлиси, ўғрилар ҳали ҳам топилгани йўқ.
“Ўргимчак одам”
“Ўргимчак одам” фильми биринчи қисми тасвирга олинаётган майдондан бош қаҳрамоннинг ҳар бири 50 минг доллар турувчи тўртта костюми ўғирланади. Полиция уларни дарров топа олмаганидан сўнг фильм ижодкорлари янги костюм тикишга мажбур бўлади. Лекин улар аслига ўхшамагани учун камерани қаҳрамонга яқин олиб келишмайди.
“Келинг, рақсга тушамиз”
“Келинг, рақсга тушамиз” фильмини тасвирга олиш жараёни нафақат ўғирлик, балки қотиллик билан ҳам боғлиқ. Фильмда бош қаҳрамон Сьюзан Сарандон таққан 4 минг долларли колье йўқолади. Колье Канададаги “Royal Albert Arms” меҳмонхонасидан топилади. Тақинчоқ топилган хонада бир киши ўлдириб кетилган эди. Унинг кимлиги ҳали ҳам номаълум бўлиб қолмоқда.
“Саҳронинг оқ қуёши”
“Саҳронинг оқ қуёши” фильмини тасвирга олиш чоғида майда безорилар қилич билан бош қаҳрамон ўртоқ Суховнинг бир неча соатини ўғирлаб кетади. Ўша пайтда картинанинг учдан икки қисми суратга олиб бўлинган, ўғирланган буюмлар унинг қолган қисмида ҳам қатнашиши шарт эди. Шу сабабли, режиссёрлар майда ўғриларга гапи ўтадиган каллакесар Алини топиб, ундан ёрдам сўрайди. Ўғирланган буюмлар эртаси куниёқ топилади, Али эса Суховни қўлга олиш саҳнасида жиноятчилардан бири ролини ўйнайди.
Чўлпоной Аҳмедова тайёрлади.