Жиззахда қурилган янги стадион 14 кунда қулаб тушди
Стадион қурилишига 160 миллион сарфланган.
Жиззах вилоятининг Бахмал туманида "Ташаббусли буджет" доирасида қурилган сунъий қопламали стадион фойдаланишга топширилгандан атиги 14 кун ўтиб қулаб тушди.
Ушбу лойиҳа 2024 йилнинг биринчи мавсумида ғолиб деб топилган бўлиб, уни "Сув иншоот қурилиш лойиҳа" МЧЖ амалга оширган.
Маҳаллий манбаларга кўра, фаоллар ушбу стадион ғолиб бўлиши учун шахсий маблағларидан 160 миллион сўм сарфлаган. Бироқ қурилиш сифати паст ёки назорат етарли даражада олиб борилмагани сабабли иншоот қисқа муддат ичида носоз ҳолга келган.
Ушбу ҳолат жамоатчилик орасида муҳокамаларга сабаб бўлиб, лойиҳанинг шаффофлиги ва қурилиш сифати бўйича кўплаб саволларни келтириб чиқармоқда.
