Кийим дўконида калтакланган ходимнинг иши судга оширилди
ИИББ ҳолат бўйича маълумот берди.
Аввалроқ Тошкент шаҳрининг Сергели туманида жойлашган Inbazar савдо маркази филиалида ходим дўконнинг бошқа бир вакили томонидан калтаклангани ҳақида хабар берилганди.
Аниқланишича, ҳолат 13 сентябрь куни рўй берган. Сергели туманида жойлашган савдо мажмуасида ишловчи 2001 йилда туғилган Б.A. ўзаро келишмовчилик оқибатида бирга ишловчи 2006 йилда туғилган M.T.ни қўли билан урган. Ушбу ҳолат савдо мажмуасининг бошқа ходими – 1998 йилда туғилган X.Э. томонидан видеога олинган. Бироқ, фуқаро M.T. мазкур ҳолат юзасидан муқаддам ички ишлар органларига мурожаат қилмаган.
Ҳолат юзасидан Маъмурий жавобгарлик тўғрисидаги кодексининг 183-моддаси (Майда безорилик) аломатлари билан ҳужжатлар расмийлаштирилиб, қонуний чора кўриш учун Жиноят ишлари бўйича Сергели туман судига юборилган.
