Кучли қор бўронлари туфайли Қозоғистоннинг қатор вилоятларида трассалар ёпилди (видео)
Йўлларда қолиб кетган 600 дан ортиқ киши эвакуация қилинган.
Қозоғистонда ўта кучли қор бўронлари туфайли автомобиль йўлларидаги 127 участка ёпилди. Бу ҳақда Sputnik Казахстан хабар берди.
Қайд этилишича, ёпилган қисмларнинг 49 таси Республика даражасидаги йўлларда, 79 таси вилоят даражасидаги йўлларда жойлашган. Сўнгги суткада йўлда қолиб кетган 691 киши, хусусан, 137 нафар бола эвакуация қилинган.
Олма-Ота, Оқмола, Шарқий Қозоғистон, Жамбил, Қарағанда, Костанай ва Туркистон вилоятларидаги трассалар ёпилган. Блокпостларда 600 га яқин автомобиллар тўпланиб қолган.
Ёпилган участкаларда 838 та вақтинчалик исиниб олиш пунктлари очилди. Ҳозирги вақтда бу ерда 420 одам жойлашган, уларнинг 69 тасини болалар ташкил этади.
Республика ҳукумати йўлларда фавқулодда ҳолатларни олдини оши учун штаблар тузган.
