Қашқадарё вилоятида ҳайдовчилардан бири маст одамни уриб юбориб, жабрланувчига биринчи ёрдамни кўрсатмасдан, уни пахта даласига ташлаб кетган.
Маълум қилинишича, ҳодиса Қарши тумани ҳудудидан ўтган йўлда содир бўлган. Қарши тумани Қорақуччи маҳалласида яшаган марҳум кечки соат 00:30 атрофида онасининг уйидан маст ҳолда чиққан ва шунда уни машина уриб кетган.
ИИО томонидан олиб борилган суриштирувларда ЙТҲни Қарши туманида яшовчи Лабо ҳайдовчиси содир этгани аниқланган. Маълум бўлишича, ҳайдовчи пиёдани уриб юборганидан сўнг уни машинага ортиб, ўша атрофдаги пахта майдони ёқасига ташлаб кетган. Оқибатда, тез тиббий ёрдам кўрсатилмагани сабабли жабрланувчи ҳалок бўлган.
Қайд этилишича, ҳолат юзасидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлимига сабаб бўлса) ва 117-моддаси 2-қисми (хавф остида қолдириш одам ўлимига сабаб бўлса) билан жиноят иши қўзғатилган.
