ЛГБТ фаолларини пойтахт марказига чақиришда айбланган блогер устидан суд иши бошланди
Блогер Миразиз Бозоров уч йилгача озодликни чеклаш билан жазоланиши мумкин.
Тошкент шаҳридаги Жиноят ишлари бўйича Миробод туман судида блогер Миразиз Бозоровга нисбатан жиноят иши 20 январь куни соат 11:00 да кўриб чиқиш бошланди.
Бу ҳақида Ўзбекистон Олий судининг интерактив хизматлар порталидаги маълумотлар хабар берди.
Унга кўра, очиқ суд муҳокамаси судья Сардорбек Содиқов раислигида бўлиб ўтади.
Жабрланувчилар сифатида Шуҳрат Зойир ўғли Мусаев (блогер), Аброр Мухторалиевич Абдуазимов (Ўзбекистон мусулмонлари идораси ходими), Дмитрий Абдукаримович Расулов ва Жаҳонгир Зоҳиджонович Салимовлар кўрсатилган.
Маълумот учун: Миразиз Бозоров 28 март куни ўз уйи олдида калтакланган эди. Унда бир неча жароҳат ва синишлар қайд этилган. Шу куни у "аниме ва К-поп" мухлисларини пойтахт марказига йиғилишга чақирган.
Тошкент марказида ЛГБТ фаолларига қарши намойиш бўлиб ўтган. Ўнлаб эркаклар Форумлар саройи қаршисида йўлнинг ҳаракат қисмида юриб, "Аллоҳу акбар!" деб такбир айтган.
ИИББ 12 кишининг қўлга олингани ва Жиноят кодексининг 277-моддаси 2-қисмининг "Б" банди (бир гуруҳ шахслар томонидан содир этилган безорилик) бўйича жиноий иш қўзғатилгани ҳақида хабар берган.
Чўлпоной Аҳмедова
