"Олдиндан келишиб олайлик, менга "ҳурматли" дея мурожаат қилманглар" — ЗОЙИР МИРЗАЕВ қатъий қарорлар қабул қилди

 

Унда вилоятнинг 22 та туман-шаҳарлари сектор раҳбарлари, вилоятдаги барча бошқарма ва ташкилотлар ва уларнинг ҳудудий бўлинмалари бошлиқлари, маҳаллий кенгашлар депутатлари, вилоят фаоллари иштирок этди.

 

Йиғилиш аввалида вилоят раҳбари бошқарув сиёсатида белгилаб олинган энг устувор вазифаларга алоҳида тўхталиб ўтди. Хусусан:

 

— Фуқаролар билан қабулни кўчма тартибда олиб борамиз. Унда ҳамма сектор раҳбарлари қатнашади. Соат 14:00 да бўладиган қабулга соат 8:00 да ўша мурожаатчининг сектор раҳбари, тегишли ташкилот мутасаддиси уйига бориб, масаласини жойида ўрганиб чиқади.

 

— Қандай тоифадаги раҳбар бўлишидан қатъий назар, билиб олсин, фаолиятимизнинг асосий мезони "Инсон қадри учун" тамойили асосида бўлади. Буни керак бўлса, столнинг устига ёзиб қўйинг. Яна шуни ҳам ёзиб қўйингларки, ишимизда "майда-чуйда масаланинг ўзи йўқ".

 

— Ҳафтада бир марта, душанба куни бажарилган ишлар таҳлили, муҳокамаси бўйича йиғилиш ўтказилади.

 

— Фуқароларнинг мурожаатларини қабул қиладиган Telegram-bot ташкил қиламиз. Керак бўлса, ўша фуқаро билан телефонда ўзим гаплашаман.

 

— Ҳокимиятдан ҳар бир чиқаётган қоғоз ҳокимиятнинг юзи. Давлат тили бўйича ҳокимият ҳужжатларини хато ёзадиган ходим ҳокимиятда ишлаши мумкин эмас.

 

— Ошкоралик, шаффофлик кўпчиликка ёқмайди, лекин ҳар қандай чиққан негативга сектор раҳбари муносабат бериши шарт. Ижтимоий тармоққа киришни билмасангиз ўрганинг, раҳбар замондан орқада қолиши мумкинмас.

 

— Олдиндан келишиб олайлик, менга "ҳурматли" дея мурожаат қилманглар.

 

— Нимага айрим ҳокимлар блогер, журналистлар учун ёпиқ?! Пресс-тур ўтказиб, журналистлар ёнида юриб, бажарилаётган ишларни кўрсатинглар. Ёмонини ҳам кўрсатайлик, ёмони ҳам ўзимизники.

 

— Дарахт экаверамиз, лекин унинг кўкариб чиқишичи?

 

— Вилоятимиз туман-шаҳарларидаги таҳририятларни қўллаб-қувватлашга тайёрман. Гаеталар бизга керак. Ҳудудий таҳририятлардаги журналистлар тажрибасини қадрланглар, қўллаб-қувватланглар. Бу бўйича мутасаддилардан аниқ таклифлар кутамиз.

 

Йиғилиш якунида вилоят ҳокими сектор раҳбарлари ва вилоят мутасаддиларига бир қанча топшириқлар бериб, селекторни якунлади.

 

Маълумот учун: Зойир Мирзаев 2019 йилнинг октябрь ойидан Қашқадарё вилоят ҳокими лавозимида фаолият олиб борган. У жорий йилнинг 18 ноябрь куни эса Тошкент вилояти ҳокими этиб тайинланди.