Омбудсман аралашувидан сўнг 40 миллион сўмга яқин иш ҳақлари тўлаб берилди
"Сурхондарё Агрохизмат" МЧЖнинг тўрт нафар собиқ ходими шу йилнинг август ойида апрель-июль ойлари учун иш ҳақи вақтида тўланмай келгани сабабли ишдан бўшаган. Лекин уларга 4 ойлик маоши ҳам тўланмай, ходимлар билан якуний ҳисоб-китоб қилинмаган.
Сурхондарё вилояти Шеробод туманида яшовчи бу фуқаролар иш ҳақларининг тўлаб берилишида амалий ёрдам сўраб, Инсон ҳуқуқлари бўйича вакили (Омбудсман)га мурожаат қилади.
Мазкур мурожаат Омбудсман назоратига олиниб, "Сурхондарё Агрохизмат" МЧЖга меҳнат қонунчилиги бузилиш ҳолатларини бартараф этиш бўйича мурожаат юборилгач, жамият собиқ ишчиларининг қолдиқ иш хақлари тўлиқ ҳисоблаб чиқилиб, уларга 40 миллион сўмга яқин иш ҳақлари тўлаб берилди.
Эслатиб ўтамиз, аввалроқ МИБ Наманганда 15 нафар фуқаронинг 26 миллиард сўмлик иш ҳақларини ундириб бергани ҳамда Ўзбекистонда бюджет ташкилоти ходимларининг иш ҳақларини онлайн кузатиб бориш мумкинлиги ҳақида хабар берилганди.
Баҳринисо Мадумарова тайёрлади.
