Ҳужжат лойиҳасига кўра, жами 61 та бозор, жумладан, Тошкент шаҳридаги 20 та бозор ва савдо комплекслари “ҳаммаси бир жойда” тамойили асосида савдо мажмуаларини ташкил этиш тажрибаси кўриб чиқилади.
Истиқболда Ўзбекистондаги бозор ва савдо комплекслари устав капиталидаги давлат акция пакетлари (улушлари)ни босқичма-босқич сотувга қўйилади.
Бу борадаги ҳужжат лойиҳаси муҳокама учун эълон қилинди. Шунингдек, улардан жами 12 бозор ва савдо комплекси тугатилади.
Маълумот ўрнида: Сирдарёдаги бир нечта бозорлар сотувга қўйилади. Бу бўйича Вазирлар Маҳкамасининг тегишли қарори норматив-ҳуқуқий ҳужжатлар лойиҳалари муҳокамаси порталига жойлаштирилди.
Тошкент шаҳрида сотувга қўйиладиган бозорлар қаторида Паркент универсал савдо комплекси, Янгиобод ихтисослашган бозори, Қорақамиш деҳқон бозори, Юнусобод деҳқон бозори, Ўрикзор савдо комплекси, Қўйлиқ деҳқон бозори, Чорсу буюм савдо комлекси, Олой деҳқон бозори ва Бек тўпи савдо комплекси ҳам бор. Шунингдек, Гулистон шаҳридаги “Гулистон деҳқон бозори” МЧЖ, Мирзаобод туманидаги “Наврўз авто уловлар сотиш бозори” МЧЖ ва Сирдарё туманидаги “Бахт-Х” МЧЖлар ҳам рўйхатга киритилган.
Қайд этилишича, бозор ва савдо комплексларидаги давлат улушларини сотиш шартлари ва усуллари давлат мулкини сотишда тендер савдоларини ўтказиш бўйича давлат комиссияси қарорига асосан белгиланади.
Лойиҳанинг мақсади сотишдан тушган маблағларнинг республика бюджетига тақсимланадиган қисми, истисно тариқасида, Қорақалпоғистон Республикаси бюджетига, вилоятлар ва Тошкент шаҳрининг маҳаллий бюджетларига ҳамда объект жойлашган туман (шаҳар) маҳаллий бюджетига тенг улушларда йўналтирилади.
Бундан ташқари, устав капиталидаги давлат акция пакетлари (улушлари) сотилгунга қадар бозор ва савдо комплекслари томонидан уларнинг мол-мулкларини сотиш, йирик битимлар тузиш, активларини гаров таъминоти сифатида ва бошқа тарзда тасарруф этиш тақиқланади.
Эслатиб ўтамиз, аввалроқ Ўзбекистон бозорларидаги нарх-наво маълум қилингани ва истеъмол бозоридаги товарлар ва хизматлар ўртача 0,2 % га арзонлашгани ҳақида хабар берилганди.
Чўлпоной Аҳмедова