Ўзбекистоннинг бир қатор ҳудудларида электр энергиясида узилишлар кузатилмоқда
Об-ҳавонинг исиши сабабли Тошкентда электр энергиясида чекловлар киритилаётган бўлса, Сирдарёда электр узатиш тармоғида носозлик юзага келган
Энергетика вазирлиги маълумотларига кўра, Сирдарё вилоятидаги 3 та туманнинг айрим ҳудудларида электр таъминотида узилиш кузатилмоқда.
Қайд этилишича, Сирдарё вилоятидаги 110 кВ кучланишли электр узатиш тармоғида носозлик юзага келган. Бунинг натижасида Гулистон, Боёвут ва Сайҳунобод туманлари истеъмолчилари қисман электр таъмнотидан узилган.
Шунингдек, вазирликнинг хабар беришича, соат 17:25 да Тошкент шаҳридаги «Библиотечная» подстанциясида ҳам носозлик юзага келган. Бунинг натижасида Олмазор тумани истеъмолчилари (жами 930 та) қисман электр таъмнотидан узилган.
«Ҳудудий электр тармоқлари» АЖ хабарига кўра, об-ҳавонинг кескин исиши натижасида электр энергиясида юқори истеъмол кузатилаётганлиги сабабли электр узатиш линиялари, подстанциялар ҳамда тақсимлаш қурилмаларида вужудга келиши мумкин боълган йирик авариявий ҳолатларни олдини олиш мақсадида Тошкент шаҳрининг айрим ҳудудларида вақтинчалик чекловлар киритилмоқда.
Жумладан, пойтахтнинг Яшнобод, Олмазор, Миробод, Яккасарой, Шайхонтоҳур, Чилонзор ва Сергели туманларининг айрим кўчаларида чекловлар жорий этилган.
