Ўзининг собиқ рафиқасини 5000 АҚШ долларга баҳолаган эр қўлга олинди
Ушбу фуқаро интернет имкониятларидан фойдаланиб, собиқ хотинини шарманда қилишини айтган.
Қашқадарё вилоятининг Қарши шаҳар ИИО ФМБ бошлиғи номига 23 ёшли Б.М. ариза билан мурожаат қилиб, унда собиқ турмуш ўртоғи 24 ёшли Й.Ф. унинг шахсига оид маълумотларни ва унинг экспертиза ҳужжатларини ўқиш ва иш жойи ҳамда бошқа шахсий маълумотларини ижтимоий тармоқларга тарқатиб юбориш билан қўрқитиб, бунинг эвазига 5000 АҚШ доллар пул маблағларини талаб қилиб келаётганлигини маълум қилган.
Ўтказилган рейдда Й.Ф. Қарши шаҳридаги “Яшил бозор” савдо дўкони ёнида фуқаро Б.М.,дан талаб қилган 5000 АҚШ долларидан махсус кимёвий ишлов берилган 2500 АҚШ долларини олган вақтида тадбир иштирокчилари томонидан ушланиб, пул маблағлари ашёвий далил тариқасида расмийлаштириб олинган.
Ҳолат юзасидан Қарши шаҳар ИИО ФМБ ҳузуридаги Тергов бўлими томонидан Й.Ф.,га нисбатан Ўзбекистон Республикаси Жиноят кодексининг 165-моддаси 1-қисми (товламачилик) билан жиноят иши қўзғатилиб, у гумон қилинувчи тариқасида жалб қилинган.
Тергов якунига кўра, фуқаронинг хатти-ҳаракатларига қонуний баҳо берилиши кўзда тутилган.
Эслатиб ўтамиз, аввалроқ Тошкентда "шантаж" қилиб, севгилисидан пул ундирмоқчи бўлган йигитнинг режаси чипакка чиққани ҳамда ишқий муносабатнинг ошкор этилиши 22 минг АҚШ долларга баҳоланганлар тақдири ҳақида хабар берилганди.
Чўлпоной Аҳмедова
