Франция ҳукумати дори етказиб бериш билан боғлиқ муаммолар туфайли парацетамолнинг онлайн савдосини январь ойи охиригача тақиқлади.
“Фақат парацетамолдан ташкил топган дори воситаларининг онлайн савдоси 2023 йил 31 январга қадар тўхтатилди”, — дейилади ҳукумат баёнотида.
Қайд этилишича, Францияда парацетамол асосидаги дори-дармонларни етказиб бериш билан боғлиқ кескин вазият олти ойдан ортиқ давом этмоқда, бу болалар учун мўлжалланган дори воситаларига ҳам тегишли.
Аввалроқ Жаҳон соғлиқни сақлаш ташкилоти грипп, респиратор синцитиал вирус ва коронавируснинг қишки тўлқини туфайли Парацетамол каби оддий оғриқ қолдирувчи воситаларга талаб ортиши ва маҳсулот етишмаслиги ҳақида хабар берган эди. Бундан ташқари, дунёда антибиотиклар, хусусан, пенициллин ва амоксициллин етишмовчилиги мавжуд.
Коронавирус пандемияси даврида антибиотикларга бўлган талабнинг пасайиши ва етказиб бериш занжиридаги жиддий танглик компанияларни ишлаб чиқаришни қисқартиришга мажбур қилди.