Наманган вилояти ФВБ Қамчиқ довонида 2 аёл сел оқизиб кетиши оқибатида ҳалок бўлганини маълум қилди.
Аниқланишича, 7 июль куни М-39 Гулистон-Бўка-Ангрен-Қўқон ва Андижон орқали — Ўш автомобиль йўлининг Тошкент-водий йўналишида икки аёл (иккаласи ҳам 27 ёш) тоғ баландлигидаги йирик шохли молларини соғиш учун кетаётган бўлган.
Шундан сўнг соат 19:20 дан 19:27 гача кучли жала ёғиши кузатилган. Натижада аёллар бу пайтда сел тошқин сувлари учун махсус мўлжалланган 1200 диаметрли темир қувур ичига кириб олган. Шу вақтда 40−50 метр куб миқдоридаги сел келиб, аёлларни қувур ичидан «Резаксой»нинг 400 метр оқими бўйлаб олиб кетган.
«Сойни сел массасидан тозалаш жараёнида уларнинг жасади топилган», — дейилади хабарда.
Ҳозирда ИИБ тезкор-тергов гуруҳи томонидан дастлабки терговолди суриштирув ишлари олиб борилмоқда.