Қашқадарёда туғилган 3 эгизакка Зироат, Саида ва Шаҳноза исмлари қўйилди
Қашқадарё вилоятининг Яккабоғ туманидаги Хазратовлар оиласида уч эгизак фарзанд туғилди, деб хабар беради NasafNews.
Маълум қилинишича, туманнинг «Ғозлиқ» маҳалласи Қўтонтепа қишлоғида истиқомат қилувчи Муслимбек Хазратов ва Навбаҳор Душаева оиласида 3 нафар эгизак қизалоқ дунёга келган.
Қизалоқларнинг бобоси Шодиёр Сафаровнинг айтишича, эгизаклар 31 август куни Тошкент шаҳридаги Перинатал марказда туғилган.
Эътиборлиси, уларга Президент Шавкат Мирзиёевнинг оила аъзолари – рафиқаси Зироатхон, қизлари Шаҳнозахон ва Саидахоннинг исми қўйилган. Шодиёр Сафаровнинг айтишича, бу борада Президентга хат ёзиб, улардан розилик ҳам олинган.
Эслатиб ўтамиз, 2020 йил октябрида Бухоро вилояти Шофиркон туманида 3 эгизак туғилгани, уларга Мирзиё, Миромон ва Саида исмлари қўйилганди.
Шунингдек, 2019 йилда Жиззах, Хоразм, Бухоро, Қашқадарё вилоятларида туғилган уч эгизакларга Шавкат, Миромон ва Мирзиё исмлари Фарғонада туғилган уч эгизакка эса Шавкатжон, Зироатхон ва Саидахон исмлари қўйилган.
