Тоғли Қорабоғ арманлари ўз уйларини тарк этишга қарор қилишлари мумкин, бунинг эҳтимоли катта. Бу ҳақда Арманистон бош вазири Никол Пашинян халққа мурожаати чоғида айтиб ўтди.
“Тоғли Қорабоғ арманлари ҳали ҳам этник тозалаш хавфига дуч келишмоқда. Сўнгги кунларда Тоғли Қорабоғга гуманитар ёрдам етиб келди, аммо бу вазиятни ўзгартирмайди”, — деди Пашинян.
Унинг қўшимча қилишича, расмийлар зарур ҳолларда Тоғли Қорабоғдан келган ватандошларни Арманистонга қабул қилишга тайёр.
“Агар саъй-ҳаракатлар аниқ натижа бермаса, ҳукуматимиз Тоғли Қорабоғлик биродарларимизни меҳр билан кутиб олади”, — деди у.
Эслатиб ўтамиз, 19 сентябрь куни Тоғли Қорабоғда яна бир кескинлик бошланди. Боку маҳаллий аксилтеррор чоралари бошланганини эълон қилди ва арман ҳарбийларини минтақадан олиб чиқиб кетишни талаб қилди. Ереван Қорабоғда арман қуролли кучлари йўқлигини таъкидлади. Ереван аҳолиси Арманистон ҳукумати биноси олдида норозилик намойиши ўтказиб, содир бўлган воқеада мамлакат раҳбарияти ва шахсан бош вазир Никол Пашинянни айблади.