Қорақалпоғистонда йўловчи поезди аёл кишини уриб юбориши билан боғлиқ ҳодиса содир бўлди. Бу ҳақда “Ўзбекистон темир йўллари” АЖ матбуот хизмати хабар берди.
Маълум қилинишича, ҳодиса 2026 йил 22 январ куни Гидроузел ва Нукус станциялари оралиғида юз берган. Аёл киши темир йўлни кесиб ўтиш учун мўлжалланмаган ҳудуддан рельсларни кесиб ўтишга уринган ва натижада йўловчи поезди остида қолиб кетган.
Компания маълумотларига кўра, жабрланувчи темир йўлни кесиб ўтиш қоидаларини бузган ҳолда ўз ҳаётини хавф остига қўйган. Ҳозирда масъул органлар томонидан ҳодисанинг барча ҳолатлари ўрганилмоқда.
“Ўзбекистон темир йўллари” АЖ ҳозирча жабрланувчининг аҳволи бўйича қўшимча маълумот бермаган. Шунингдек, темир йўл компанияси фуқароларни темир йўлларни фақат белгиланган жойлардан кесиб ўтишга ва хавфсизлик қоидаларига қатъий риоя қилишга чақирди.