“Рухсатсиз кириш имконияти мавжуд эмас” - 15 млн ўзбекистонликнинг маълумотлари тарқалиб кетгани бўйича муносабат билдирилди
Солиқ қўмитаси ва Ички ишлар органлари ахборот тизимлари хавфсизлиги тўлиқ таъминланганини маълум қилди.
Ижтимоий тармоқлар ҳамда айрим интернет манбаларида давлат ахборот тизимларидан камида 15 миллион нафар Ўзбекистон Республикаси фуқаросининг шахсий маълумотлари ноқонуний тарзда олиниб, Dark Web тармоқларида тарқатилгани ҳақида хабарлар тарқалди. Мазкур хабарларга кўра, сиздирилган базада шахсни тасдиқловчи ҳужжатлар ва бошқа шахсга доир ахборотлар мавжуд бўлиши мумкин.
Мазкур ҳолат юзасидан ваколатли давлат органлари томонидан ўрганиш ишлари олиб борилмоқда.
Солиқ қўмитаси маълум қилишича, қўмита тасарруфидаги барча ахборот тизимларини киберҳужумлардан ҳимоялаш бўйича зарур техник ва ташкилий чоралар кўрилган. Ҳозирда барча интерактив хизматлар ҳамда ахборот тизимлари белгиланган тартибда барқарор ва узлуксиз фаолият кўрсатмоқда.
Шунингдек, Ички ишлар органлари расмий баёнотига кўра, уларнинг тасарруфидаги ахборот тизимларининг ахборот хавфсизлиги тўлиқ таъминланган бўлиб, унда сақланаётган шахсга доир маълумотларнинг дахлсизлиги кафолатланган. Ушбу тизимларга ташқи манбалар орқали рухсатсиз кириш имконияти мавжуд эмас.
