Самарқанд давлат университетига Шароф Рашидов номи берилади — Шавкат Мирзиёев

 

 

“Барчамизга яхши маълумки, қадимдан илм-фан маркази сифатида шуҳрат қозонган Самарқанд бугунги кунда ҳам ўзининг нуфузли олийгоҳлари билан машҳур.

Айниқса, Самарқанд давлат университети, Самарқанд тиббиёт институти улар орасида алоҳида ўрин тутади. Бу олийгоҳларнинг мамлакатимиз таълим тизимидаги ўрни ва салоҳиятини янада ошириш мақсадида сизлар билан ўз таклифларимни ўртоқлашмоқчиман.

Самарқанд давлат университетига ушбу қутлуғ масканда таҳсил олган, шу ерда ишлаган, республикамизда илм-фан, таълим, маданият, адабиёт ва санъат ривожига беқиёс ҳисса қўшган атоқли давлат ва жамоат арбоби, таниқли адиб Шароф Рашидов номини берсак, нима дейсизлар?

Шунингдек, Самарқанд тиббиёт институтига университет мақомини бериш ҳақида алоҳида қарор қабул қилсак, ўйлайманки, ушбу йирик олийгоҳнинг мавжуд салоҳияти ва келгуси ривожи учун янада пухта замин яратган бўламиз. Фақат ном билан чекланмаслик керак, катта-катта корпуслар, ётоқхоналар қуришимиз керак. Университетга янги шароитлар яратишимиз зарур. Ном билан эмас, мақом билан нуфузини оширамиз. Бу тиббиёт университети менга жуда яқин. Ҳар бир туманда бу университетнинг кафедраларини очамиз ва ҳақиқий халқ университетларига айлантирамиз. Мен жорий қилаётган бирламчи тиббиётга ҳақиқий намунага айланади. Бу университет халққа тиббиёт сифати бўйича халққа манфаат келтирсин.

Бўлғуси университетнинг раҳбарияти, профессор-домлалари ўзларининг билим ва тажрибасини тўла сафарбар этиб, вилоятнинг барча туман, шаҳар ва қишлоқларида аҳоли саломатлигини мустаҳкамлаш, соғлом турмуш тарзини кенг тарғиб этиш ишига муносиб ҳисса қўшадилар, деб ишонч билдираман”, деди президент.

 

Аввалроқ Шавкат Мирзиёев Самарқандга етиб боргани ҳақида хабар берилганди.