Бугун ижтимоий тармоқда Самарқанд вилояти Жомбой туманида «МАН» русумли юк автомашина ёниб кетганлиги ҳақида видеолар тарқалди.
Йўл ҳаракати хавфсизлиги Бош бошқармасининг маълум қилишича, жорий йилнинг 26 декабрь куни соат 04:00 ларда, Самарқанд шаҳри ҳудудидан ўтувчи М-39 автомобиль йўлининг 1079-километрида «Тошкент-Самарқанд» йўналиши бўйлаб ҳаракатланиб келаётган, «МАН» русумли юк автомобилининг юкхонасидаги музлатгичда қисқа туташув содир бўлган ва унинг ортидан ёнғин юзага келган. Ушбу ёнғин транспорт воситасининг кабина қисмига ҳам таъсир этган.
Ёнғин ўт ўчирувчилар томонидан бартараф этилган. Тан жароҳати олган фуқаролар йўқ.
Ҳозирда ушбу ҳолат юзасидан суриштирув ишлари олиб борилмоқда.
Аввалроқ Қамчиқ довонида пахта толаси ортиб кетаётган юк машинасининг ёниб кетгани ҳақида хабар берилганди.