Шимолий Корея иқлим ўзгариши туфайли очарчилик ёқасига келиб қолди
Шимолий Корея раҳбари Ким Чен Ин қишлоқ хўжалиги экинларини йўқ қилган сув тошқинлари ва қурғоқчиликдан кейин иқлим ўзгаришига қарши “шошилинч чоралар” кўришга чақирди. Сиёсатчи давлат амалдорларига Сиёсий Бюро йиғилишида "ғайритабиий иқлим" оқибатларига қарши курашишни буюрди. Шунингдек, сўнгги йилларда глобал исиш хавфи кучайганини таъкидлади.
Сўнгги йилларда Шимолий Корея кучли сув тошқинлари остида қолди. Ҳозирда қишлоқ хўжалиги соҳаси ўта заифлашиб, мамлакат очарчлик ёқасига келиб қолди. Пандемия даврида иқтисодиётнинг бу секторида аҳвол янада оғирлашган.
Шимолий Корея давлат телеканали маълумотларига кўра, августда мамлакатнинг шимоли-шарқий ҳудудларида кучли ёмғир ёғиши кузатилган. Оқибатида 1 минг 170 та уй вайрон бўлган ёки сув остида қолган. 5000 киши хавфсиз ҳудудларга эвакуация қилинган.
Сиёсий Бюро йиғилишида Ким амалдорлардан ўзгараётган иқлим шароитида ер ресурсларидан самарали фойдаланишга эътибор қаратишни сўраган.
У мансабдорларни дарёларни яхшилаш, эрозияга қарши ўрмонларни тиклаш, тўғонларни сақлаш ва қирғоқлар қуриш лойиҳаларини талаб қиладиган "улкан режа” ишлаб чиқишга чақирган. Шунингдек, тошқинларни бошқаришнинг барқарор инфратузилмасини яратишга буйруқ берган.
Шимолий Корея ҳудуди асосан тоғлардан иборат. Шу сабабли қишлоқ хўжалигига яроқли ерлар нисбатан кам. Кўп фермерларда қишлоқ хўжалиги техникаси йўқ.
Юқоридаги омиллар туфайли бугунги кунда Шимолий Корея аҳолисининг учдан бир қисми ёрдамга муҳтож.
Мафтуна Режаббоева
