Сурхондарёда ҳужра ташкил этиб, болаларни калтаклаган шахс ушланди
У таълим бериш жараёнида болаларга ўта қўпол муомалада бўлган.
Сурхондарё ИИБ ҳамда ДХХ ходимлари томонидан 2000 йилда туғилган шахснинг Бойсун тумани Дарбанд маҳалласида вақтинча истиқомат қилувчи хонадони кўздан кечирилди.
У 2025 йилнинг март ойидан июль ойига қадар 9 нафар шахсларга моддий манфаат эвазига ҳужра шароитида диний таълим бериб келаётгани маълум бўлган.
Ушбу шахс таълим бериш жараёнида болаларга ўта қўпол муомалада бўлиб, уларни аёвсиз калтаклаган. Ҳозирда вояга етмаганларнинг тан жароҳатларининг оғирлик даражасини аниқлаш мақсадида суд-тиббий экспертизаси тайинланиб, уларнинг ота-оналарига нисбатан Маъмурий жавобгарлик тўғрисидаги кодекснинг 47-моддаси 1-қисми билан ҳужжатлар расмийлаштирилган.
Ҳужра эгаси Хўжақулов Муҳриддинга нисбатан эса Жиноят кодексининг 110-, 219-моддалари билан жиноят иши қўзғатилиб, процессуал тартибда ушланган.
