Тожикистон ТИВ 10 ёшли боланинг ўлдирилгани сабаб Россия элчисига норозилик нотасини юборди

 

Тожикистон Республикаси Ташқи ишлар вазирлиги Россия Федерациясининг Тожикистондаги Фавқулодда ва Мухтор Элчиси Семён Григоревга Тожикистон фуқаросининг фожиали ўлими муносабати билан норозилик нотасини юборди.

 

Тожикистон ТИВ расмий баёнотига кўра, 2025 йил 16 декабрь куни Москва вилояти Одинтсово шаҳар округига қарашли Горки-2 қишлоғида жойлашган Успенская умумтаълим мактабининг 4-синф ўқувчиси, вояга етмаган Тожикистон фуқароси Қобилжон Алиевга нисбатан этник нафрат асосида ҳужум содир этилган. Ушбу ҳужум оқибатида бола воқеа жойида ҳалок бўлган.

 

Мазкур ҳолат Тожикистон томони томонидан кескин қораланди. Воқеадан сўнг Россия элчиси Тожикистон Ташқи ишлар вазирлигига чақирилиб, унга расмий нота топширилди. Унда Россия Федерациясидан мазкур жиноятни зудлик билан, холис ва ҳар томонлама тергов қилиш, шунингдек, айбдорларни амалдаги қонунчиликка мувофиқ жавобгарликка тортиш талаб этилган.

 

Шунингдек, Тожикистон Республикасининг Россия Федерациясидаги элчихонаси ушбу жиноят бўйича тергов жараёнини ўз назоратига олгани ва Россия ТИВга расмий мурожаат йўллагани маълум қилинди.

 

Тожикистон ТИВ марҳумнинг оила аъзолари ва яқинларига чуқур ҳамдардлик билдириб, хориждаги Тожикистон фуқароларининг ҳуқуқлари ва хавфсизлигини таъминлаш масаласи устувор эканини таъкидлади. Вазирлик Россия Федерациясининг ваколатли органлари томонидан ушбу воқеа тўлиқ ва адолатли ўрганилишига умид билдирди.