Тошкент аэропортида ҳушидан кетган аёл вафот этгани маълум бўлди
Аввалроқ бу хабарни Бош прокуратура инкор қилганди.
Ижтимоий тармоқда Тошкент аэропортида 37 ёшли аёл ҳушидан кетиб, вафот этгани ҳақида хабарлар тарқалганди. Бош прокуратура матбуот хизмати даставвал бу хабарни рад этиб, кейинроқ аёлнинг вафот этганини расман тасдиқлади.
Олинган сўнгги маълумотларга кўра, Тошкент шаҳрининг Чилонзор туманида яшаган аёл Дубай-Тошкент авиарейсида учиб келиб, соғлиги ёмонлашганлиги сабабли Чилонзор туманида жойлашган РШТЁИМга олиб келинган.
Тиббий реанимацион муолажаларга қарамасдан, аёлда биологик ўлим ҳолати қайд этилган. Марҳуманинг ўлими сабабини аниқлаш мақсадида судга оид тиббий экспертиза тайинланган.
Ҳозирда прокуратура томонидан терговга қадар текширув ҳаракатлари олиб борилмоқда.
