“Тинчлик, маърифат ва тараққиёт учун” шиори остида ўтаётган кинофестиваль доирасида 14 мамлакат вакиллари иштирокида “Жаҳон киноси кунлари”ни ўтказиш кўзда тутилган. Ушбу тадбирда эронлик киноижодкорларнинг ҳам иштирок этиши кутилмоқда.
Бу йилги Тошкент кинофестивалига ташриф буюрган эронликлар делегацияси таркибидан А.Тобииш, Мирза Абулфазл Аттар, Мухаммад Мехди Асғарпур, Иброҳим Мухторий, Ҳамидризо Қутбий, Алиризо Шоҳрухий, Ҳамид Теҳроний, Али Ғавитон каби таниқли киноижодкорлар ўрин олган. Улар Тошкент, Жиззах, Самарқанд шаҳарларида ўз ижод намуналарини намойиш этади.
Кинофестивалнинг “Жаҳон киноси кунлари” дастуридан ўрин олган “Эрон киноси кунлари”нинг очилиши маросими 29 сентябрь куни Ўзбекистон Ёшлар театри биносида бўлиб ўтади.
Эронлик машҳур режиссёр Иброҳим Мухторийнинг “Ҳаёт варақлари”(2017) фильми кинофестивалнинг “Жаҳон киноси кунлари” дастурини бошлаб беради.
30 сентябрь куни Ўзбекистон Ёшлари театри биносида бўлиб ўтадиган Эрон киноси кунларида режиссёр Мазиёр Мирийнинг “Сара ва Саида” (2017) ҳамда яна бир машҳур эрон режиссёри Абулфазл Жалилининг “Тунги поезд” фильмлари намойиш бўлиб ўтади.
30 сентябрь куни эронлик меҳмонлар Жиззах шаҳрида бўлади. Фильм намойишидан олдин киноижодкорлар билан ижодий учрашув бўлиб ўтади. Cўнгра Эроннинг машҳур филъмларидан бири “Суҳробнинг орзулари” бадиий филъми намойиш қилинади. Ушбу филъм режиссёри — Али Ғавитон.
1 октябрь куни меҳмонлар Самарқандга бўлади. Самарқанддаги “Ёшлар маркази”да эронлик кино усталари билан учрашув бўлиб ўтади. Бу ерда “Мерос”(2020), “Оналик” (2017) ҳамда “Диапазон” бадиий фильмлари намойиш этилади.
2 октябрь куни эса эронлик киноижодкорлар Тошкент шаҳрига қайтиб келади. Меҳмонлар “Жаҳон киноси кунлари”нинг ёпилиш маросимида қатнашади. Шунингдек, “Renaissance Hall” киноконцерт залида ўтадиган XIII Халқаро Тошкент кинофестивалининг тантанали ёпилиш маросимида ҳам иштирок этиши кутилмоқда.
Эслатиб ўтамиз, кинофестиваль бош ҳомийси: AGMK, NGMK va “O‘zbekneftgaz”. Ҳамкор ҳомийлар: “O‘ZBEKTELEKOM”, “O‘zdonmahsulot” AK, “O‘zpromstroybank”ATB, “Ipoteka-bank” ATIB, “Asakabank”AJ, “O‘zbekiston temir yo‘llari”, “Hududgazta’minot”, “UzAuto Motors”AJ, “O‘zmetkombinat” AJ, “Milliy bank”AJ, “Farg’onaazot”AJ, “Eriell”, “Bosch” TM, “Easy Booking”.
Бундан аввал Октай Кайнаржа янги Ўзбекистон ҳақидаги фикрларини айтгани, Стивен Сигал Тошкентга ташриф буюргани ҳақида хабар берилган эди.
Чўлпоной Аҳмедова