Чилонзор туманидаги 188-сонли умумтаълим мактабда болани калтаклаган аёл бошқа бир қанча ҳуқуқбузарликлар содир этиб жавобгарликка тортилди. Бу ҳақида Болалар омбудсмани хабар қилди.
Қайд этилишича, жорий йилнинг 24 сентябрь куни 1980 йилда туғилган Р.O. қизи таҳсил оладиган Яшнобод туманидаги 204-умумий ўрта таълим мактабига бориб, мактаб раҳбарияти билан тортишиб, мактаб директорининг ўринбосари Ғ.М. га нисбатан жисмоний куч ишлатган. Аёлдан жамоат жойида тартибига риоя қилиши сўралганида, мактаб ҳудудида Миллий гвардия ва ИИО ходимларига нисбатан ғайриижтимоий муносабатда бўлиб, уларнинг қонуний талабларини бажармасдан кескин қаршилик кўрсатган.
Ушбу ноқонуний ҳаракатларни Р.O. кўплаб мактаб ўқувчилари кўз ўнгида содир этган. 25 сентябрь куни жиноят ишлари бўйича Яшнобод туман судида мазкур иш кўриб чиқилган.
Р.O. суд томонидан МЖтКнинг тегишли моддалари билан айбли деб топилиб, унга 7 сутка маъмурий қамоқ жазоси, БҲМ нинг 3 баравари ва БҲМнинг 7 баравари сўм жарима жазоси тайинланган.
Шунингдек, Р.O. нинг Чилонзор туманидаги 188-сонли умумтаълим мактабда 6-синф ўқувчисига нисбатан содир этган ҳаракати юзасидан ҳозирда терговга қадар текширув ҳаракатлари олиб борилмоқда.