Тошкентда инсон аъзолари олди-сотдиси билан шуғулланган талаба ушланди

Тошкент давлат иқтисодиёт университети талабаси инсон аъзолари олди-сотдисида айбланиб, жиноий жазога тортилди. 

 

Суд ҳужжатида келтирилишича, 2003 йилда туғилган Б.А. мўмай даромад орттириш мақсадида ижтимоий тармоқларга инсон аъзоларини сотиб олиши ҳақида эълон жойлаштирган. У тарқатган эълонларида буйракни 38 минг, жигарни 43 минг ҳамда суяк илигини 23 минг долларга олишини билдирган.

 

Ушбу эълондан сўнг унга аъзоларини сотмоқчи бўлганлар алоқага чиқа бошлаган. Жумладан, фуқаро Ж.Р. у билан мулоқотга киришган. Б.А. унга битта буйрагини 38 минг долларга сотиб олишини айтган.

 

“Шерикларим Германияда. Буйракни кўчириб ўтказиш ўша ерда амалга оширилади. Бунинг учун Германияга боришингиз керак. Сафар учун олдиндан 350 доллар беришингиз керак”, деган талаба фуқарога.

 

Б.А. 2024 йил 26 апрел куни Шайхонтоҳур тумани ҳудудида Ж.Р.дан келишилган пулни олган вақтида ҳуқуқни муҳоқаза қилувчи идоралар ходимлари томонидан ўтказилган тезкор тадбирда ушланган. Унга қамоқ эҳтиёт чораси қўлланган.

 

Суд ҳукми билан Б.А. Жиноят кодекси 25- (жиноятга тайёргарлик кўриш ва жиноят содир этишга суиқасд қилиш), 133-1-моддаси 1-қисмида (инсон аъзоларининг ва (ёки) тўқималарининг олди-сотдиси) назарда тутилган жиноятни содир қилишда айбли деб топилган. Унга 3 йил озодликни чеклаш жазоси тайинланган.