Тошкентга фавқулодда қўнган British Airways ўз йўловчиларини олиб кетди
Буюк Британиянинг Исломобод — Лондон йўналиши бўйича учган VА-260 рейси экипажи парвоз вақтида Тошкентдаги захира аэропортга қўнишга мажбур бўлган.
British Airways’нинг Исломободдан Лондонга учаётган Boeing 777-200ER самолёти 22 сентябрь куни Ислом Каримов номидаги Тошкент халқаро аэропортига қўнгани тўғрисида хабар берилганди.
Тошкентда фавқулодда қўнган йўловчилар орасида бўлган машҳур британиялик телебошловчи Меҳрин Баиг "Twitter" саҳифаси орқали ёрдам сўраб, қуйидагича изоҳ қолдирган:
«Бизни Ўзбекистон аэропортида 24 соатга қулфлашди, бизга ҳеч ким қарамаяпти, отамга тиббий ёрдам беришмаяпти, унга кислород керак — ИЛТИМОС. Wi-fi ҳам, багажларимиз ҳам, дори -дармон ҳам, зарядловчи ускуна ҳам йўқ, тез орада биз алоқасиз қоламиз».
Telegram’даги «Новости Ташкентского неба» каналининг ёзишича, 23 сентябрь куни авиакомпания ўз йўловчиларини Тошкентдан олиб кетган.
«Британия авиакомпанияси лайнерининг экипажи йўловчилардан бири ўзини ёмон ҳис қилгани сабаб Тошкентга фавқулодда қўнишни амалга оширган, шунингдек, бортнинг техник носозлиги сабаб аэропортда қолган BА-260 рейси йўловчиларини олиб кетиш учун Лондон — Тошкент — Лондон маршрути бўйича қўшимча BА-9154/BА-260 рейсини амалга оширди», — дейилади хабарда.
Эслатиб ўтамиз, 22 сентябрь куни ушбу рейсдаги 83 ёшли йўловчи аёл ўзини ёмон ҳис қилган. Самолёт Тошкентга етиб келганида аёл вафот этган. Барча йўловчилар самолётдан туширилиб, Тошкент аэропорти ҳудудига жойлаштирилган.
Аввалроқ, Афғонистон пойтахти Кобулдан Тошкентга биринчи авиарейс учиб келгани ҳақида хабар бергандик.
